قومی کرکٹ ٹیم کےوکٹ کیپر بلے باز محمد رضوان ٹی20 کرکٹ میں مسلسل 2 سال 1500 سے زائد رنز بنانے والے پہلے کھلاڑی بن گئے۔
ٹرائنگولر سیریز کے افتتاحی میچ میں بنگلہ دیش کیخلاف شاندار اننگز کھیلنے والے وکٹ کیپر بلےباز نے سال 2022 میں 1500 رنز کا سنگ میل عبور کیا۔
محمد رضوان نے گزشتہ کیلنڈر ایئر میں بھی 1500 سے زائد رنز بنائے تھے۔ یوں محمد رضوان مسلسل 2 سال یہ ہدف عبور کرنے والے پہلے بلے باز بن گئے ہیں۔
اس سے پہلے ویسٹ انڈیز کے جارح مزاج بلےباز کرس گیل نے 2012 اور 2015 میں یہ کارنامہ سر انجام دیا تھا۔
قومی ٹیم کے کپتان بابراعظم نے 2019 اور 2021 میں بھی عمدہ فارم کا مظاہرہ کرتے ہوئے 1500 سے زائد رنز بنائے تھے۔
وکٹ کیپر بلے باز محمد رضوان نے کیرئیر کی 58 اننگز میں سب سے زیادہ رنز بنانے کا اعزاز بھی حاصل کرلیا ہے۔ انہوں نے 58 اننگز میں 2337 رنز بنائے ہیں۔
کپتان بابراعظم نے اتنی ہی اننگز میں 2281 اور ویرات کوہلی نے 2102 رنز بنائے تھے۔
محمد رضوان نے بطور وکٹ کیپر بلے باز سب سے زیادہ رنز بنانے کا اعزاز بھی حاصل کرلیا ہے۔ انہوں نے انگلش جارح مزاج بلے باز جوز بٹلر کو بھی پیچھے چھوڑ دیا ہے۔ جوز بٹلر نے 2119 رنز بنا رکھے ہیں۔
